TAVAEEGA MO TE FAKAFETAI (#12248)

Ko vikiiga katoa, O toku Atua, e o Koe Tela ko te Puna o matagofie silisili ese mote aofiaaga malu, te tupua-lagi mote malu, te nofoaiga-malu mo te malo, te maluga mo te gali, te faka-mataku mo te maalosi.  Sose tino e finagalogia ne Koe, e fai ne Koe ke faka-pilipili atu ki te Vasa Lasi, kae so se tino e manatu Koe ki ei e avatu ne Koe te faka-manuiaaga ke iloa ne ia Tou Igoa Tafasili i te Kalevaleva.  Latou ko la i te lagi mo te lalolagi, e seai se tino e mafai o teke atu a te faka-galuegaga o Tou finagalo maluga.  Mai i te vavau e pule ne Koe a te univesi katoa kae ka tumau ia Koe o fai Tau pule i luga i mea faite katoa.  E seai aka foki se Atua na ko Koe, ko te Mafi Katoatoa, ko te Tafasili i te Maluga, ko te Maalosi-Katoatoa, ko te AtamaiKatoatoa.  
 
Fakamaina, O te Aliki, a mata o Au tavini, ko te mea ke kite ne latou a Koe, kae fakama olotou loto ke mafai o fuli atu latou ki te kogaa-mea o Tau fakamanuiaaga faka-te-lagi, kae ke matea ne latou me koi a Ia Tela ko te Faifekau o Koe loa ia Koe mot e Punavaai o Tou Uiga Tonu.  E tonu, ia Koe ko te Aliki o lalolagi katoa.  E seai aka foki se Atua na ko Koe, ko te SeMafai o Taofiiga, ko te Maalosi-Katoatoa.

-Bahá'u'lláh
-----------------------

TAVAEEGA MO TE FAKAFETAI (#12249)

E fakaaloalogina a Koe, O te Aliki toku Atua! Au e tuku atu kia Koe a te fakafetai aua ne faka-mafai au ke lavea ne au a te Faifekau o Koe, mo te motu mai au mai i Ou fili, kae tuku aliali mau i mua o oku mata a olotou amio se-llei mo amioga masei ne fai i taimi o Ou aso, pela foki mo te fakaseai mai ia au a te faka-pikiiga kia latou, kae fai au ke fuli katoatoa atu ki Tou alofa-fakamagalo mo alofaga kaimalie.  Au e tuku atu foki kia Koe a fakafetai ona ko tuku ifo ki lalo ia au mai i kaumana o Tou finagalo a mea ko la ka fakamana i ei au mai i faka-osoosoga a latou masei mo musumusuuga a latou ko la e se-talitonu aua ia au ko oti ne fakammau fakalei loa a toku loto i luga ia Koe, kae ko tele keatea mai ia latou ko la e fakaloi ne latou a te mainaaga o Ou mata.  Tena foki au e fakafetai kia Koe auaa ne faka-mafai mai au ke tummau a te maalosi i Tou alofa, kae ke mafai o faipati atu a Ou tavaeega kae fakamaluga a Ou uiga llei, pela foki mo te aumai ke inu au i te ipu o Tou alofa-fakamagalo tela e silia atu i mea katoa e lavea mo te selavea.  
  
A Koe ko te Mafi-Katoatoa, ko Tafasili ite Maluga, ko te Faka-aloalogina Katoatoa, ko te Alofa-Katoatoa.

-Bahá'u'lláh
-----------------------

TAVAEEGA MO TE FAKAFETAI (#12250)

T avaeega e io Koe, o te Aliki toku Atua!  I taimi katoa e taumafai au o taku a Koe, au e fakalavelavegia ne te maluga o Tou tulaga mo te fonu maligiligi o te lasi o Tou mafi. Moi fai e tavae ne au a Koe salalau i te kauloaloa o Tou maalo mo te leva o taimi o Tou nofoaiga-a-tupu, e maua ne au i aku tavaeega o Koe e ttau fua mo latou kola e pau foki loa mo au, ko la a latou ko Au mea ola ne faiite, kae ne mafua mai i te maalosi o Tau puleega kae ko oti ne faka-fuiatino mai i te maalosi o Tou finagalo.  Kae i so se taimi a taku pene e tusi ne ia a te matagofie ki sose tino tokotasi o Ou igoa, au e mafaufau me e mafai o lagona ne au a leo o tena tagi fanoanoa mai i tena mao mai mo Koe, kae e mafai o atafia ne au a tena tagi auaa ko tena mavae mai ia Koe.  Au e molimau i mea katoa vagana ko Koe ko Au foafoaaga katoa kae e kapu iloto i Tou lima.  I te talia a sose faifaiiga io me ne tavaeega mai i Au meaola faiite se fakatalitonuuga o te gali o Tou alofa mo alofaaga maukoloa, tela se fakaasiiga o Tou kaimalie mo te atamai.  
  
Au e akai totuli kia Koe, O toku Aliki, i Tou Igoa Tafasili i te Takutakua tela ne fakamavae ne Koe a te mainaaga mai i te afi, mo te mea- tonu mai i te se-talitonu, ke tuku ifo ki lalo ia au mo latou kola ko aku fagasele kola e nofo tasi matou a te llei ote lalolagi tenei mote sua lalolagi.  Aumai ifo kia matou, tena la, Au mea-alofa gali kola e funa mai i mata o tagata.  A Koe, e tonu, ko te Tufuga o te foafoaaga katoatoa.  E seai aka foki se Atua na ko Koe, ko te Mafi-Katoatoa, ko te Matagofie-Katoatoa, ko te Tafasili i 
te Maluga.

-Bahá'u'lláh
-----------------------

TAVAEEGA MO TE FAKAFETAI (#12251)

Afioga mo mana katoa, O toku Atua, mo maalo katoa mo te mainaaga pela foki mo te silisili i te gali mo matagofie e io Koe.  E tuku ne Koe a te nofoaiga-a-tupu ki luga i so se tino tela e tonu mo Koe kae e taofi foki mai i sose tino e filifili Koe kiei.  E seai aka se Atua na ko Koe, ko te Pulekatoatoa, ko te Tafasili i te Maluga.  Ko Koe Tela ko Ia ne faiite mai i te seai a te univesi mo mea katoa ko la e nofo i iei.  E seai se mea e ttau kia Koe vagana ko Koe ailoa, ka ko mea katoa aka na ko Koe ne mea seai ne aoga i Ou mua mana kae kafai e fakatusa ki te matagofie o Koe loa ia Koe e seai lele loa ne uiga o latou.  
  
E mmao kii mo au o fakamaluga a Ou uiga llei vagana ko mea ko la ko oti ne fakamaluga ne Koe i Tau Tusi pa-mafa tela e fai mai a Koe penei, “E seai se kiloga e puke ia Koe, a ko Ia e puke ne ia katoa a kiloga.  A Ia ko te Maua-Gataa, ko te Lavea-Katoatoa.”(1) Matagofie e iluga ia Koe, O toku Atua, e tonu e seai se mafaufau io me se kiloga, me e pefea loa a te mataile io me ko te fakakesekese, e mafai o puke ne ia a te natula o toe failoga tafalalo loa i te foliki o Au failoga.  E tonu, a Koe ko te Atua, e seai aka se Atua vagana ko Koe.  Au e molimau ia Koe loa ia Koe tokotasi ko te fakaasiiga o Ou uiga llei, kae e seai aka foki ne tavaeega mai i 
Ou tafa e mafai o oko atu ki Tou fale mana io me e mafai ne Ou uiga llei o fuagina ne se isi tino aka na loa ko Koe. 
 
Ko te matagofie e iluga ia Koe, ko Koe e maluga atu mai i luga i sose fakamatalaga a se tino vagana ko Koe, auaa e mai luga i te mafaufau o tagata o fakalauefa fakallei a Ou uiga llei io me o maina i uiga loto o Koe.  E mao mai i Tou mana e mafai ne Au mea faiite ola o fakamatala a Koe io me ko se isi tino mai i Ou tafa e mafai o iloa a Koe.  Ko oti ne iloa ne au a Koe, O toku Atua, ona ko Koe ne fakailoa mai ke iloa a Koe ne au, kae moi fai e se fakaai mai a Koe kia au, e se mafai o iloa ne au a Koe.  Au e tapuaki kia Koe ona ko Au kalaga kia au ke oko atu au, kae moi fai e se kalaga mai Koe e se-tapuaki atu au kia Koe.  
 
  
¹Qur’án 6:103.

-The Báb
-----------------------

